寶寶雞煲 招呼好 食物鮮 有質素

今次不選麻辣雞，因為朋友唔食得辣，所以揀左姬蟲茸翅瓜雞窩半隻，但有驚喜，因為是呢度食材都幾新鮮，所以整體來講，唔錯呀！最值一提是這裏的老闆，招呼一流，知朋友不吃辣便推薦我們試姬蟲茸翅瓜雞窩，結果真是無介紹錯，好滿意。

姬蟲茸翅瓜雞窩半隻$188／全隻$370

呢個湯底真是無敵，水一滾起姬蟲茸香味樸鼻而來，未打邊爐飲啖湯先，香濃味美，滋陰養顏。那素翅吸收了湯頭的精華，正呀!

牛魔皇拼盤大四喜

一碟內便有齊四款，包括澳洲M9和牛、潮汕牛肉(吊龍)、潮汕牛肉(雪花)及手切新鮮牛肉，睇番張點餐紙，單點半碟都要$168，依家4款加埋都是$398，仲可以試足4 款，真心好抵食，M9和牛肉嫩滑無比，吊龍肉味香濃有口感，雪花牛油脂分佈平均，手切鮮牛，好有肉味滑溜好正，配上點選了的姬蟲茸湯底，與牛真是超夾。

老闆推介，滾牛肉時記住連牛脂一同滾，及送進口中，牛脂香牛肉嫩，簡直是天生一對，都是首次試呢種新食法，真是一試就難以自拔。

自製鯪魚球$28/4粒

食得出是自家製，鯪魚球不是彈牙那種，是有鯪魚的軟腍口感，鮮甜味。

招牌潮州魚蛋$28/4粒

潮州魚蛋都幾爽甜，就真是幾彈牙呀！

汕頭牛筋丸$48/4粒

一啖咬落去是爆汁，牛肉味很濃，那種彈牙的口感，吃得出是手打才能那麽的出色，必試。

新鮮帶膏鵝腸$88

好少地方會有帶膏的鵝腸，我就當然唔會錯過，入口好爽帶膏更添香，好好味。

脆鯇腩$98

切得厚身的脆鯇腩，帶有魚油的香，肉質真是脆口，超愛。

龍躉魚尾片$198

平時唔多識食魚尾，但見有龍躉魚尾就試試，估唔到龍躉魚尾有咁多肉，不知幾鮮甜。正呀！

大大件的龍躉魚尾，肉質真是好鮮甜。

炸釀百花油條$108及香煎墨魚餅$78/6件

呢個真是認真鬼馬，油炸鬼內釀入蝦膠，入口脆中帶彈牙的蝦膠，兩者好夾到無得彈。至於香煎墨魚餅，表面金黃煎得好香口，高質好味，一碟六件同朋友每人二件食得好滿足。

香煎墨魚餅入口帶點彈力，還有細細粒的墨魚肉。