七分鐘食得的簡易美點

 本來諗住煎埋三文魚鮱腩先POST，但真是忍唔住，呢兩款同樣在青衣市場的燉湯市場買的，我都未試過，加上買夠三件貨品，仲有95折就試下，但真心好味。

先講千層蔥餡拉餅，一盒入面有四塊都是用牛油紙隔住，好簡單加少少油(唔落油)都得，用平底鑊煎完一邊，煎另一邊就食得，入口餅皮軟糯，內裡香蔥份量剛剛好，當然再多點更正，因我超愛食蔥及愛辣呀 !

而在煎第二塊時，我無特別加油，只灑了七味粉同煎，但同樣好好味，所以食完會再買，還可暫時一解我對台中三星蔥的思念。

呢款韓國小籠包，好簡單的用水清蒸7分鐘就食得，真是皮薄餡靚，入口肉汁全數送入口中，肉質鮮嫩多汁，一包入面仲有好多粒，好好食。

仲有在另一家買了呢隻酥炸蝦條$40，無氣炸鍋，又唔想用油炸，決定用光波爐，5分鐘就食得，外脆卜卜，內裡全是蝦肉，好鮮甜。呢個下午茶小食真係唔錯。不過剛上網發現原來呢隻酥炸蝦條，網上賣俾VIP都$48，有啲賣$51，咁我買$40又真係好抵，最緊要是好食，呢款都試得過。